شبح خيَّال - آمال محمود كحيل

شبح خيَّال
بقلم
آمال محمود كحيل
 
 
بشوفه كتير
قصاد مني
وشاغل فكري وعنيه
شبح خيَّال ملاحقني
ملازم ظلي بالثانية
وانا قاعدة ، وانا ماشية
وانا نايمة ، وانا صاحية
بشوف صورته كما التِّعبان
في كل مكان
وكل زمان
وباهرب منه - من خوفي -
لكن يرجع ... يحلَّقلي
وتسري الرعشة
في كفوفي
ساعة ما عنِيه تبحلقلي
وباتوسل بصوت منهوك
غُلُب يِكسَر .. وتر صمتُه
عشان خاطري
بلاش أرجوك
بلاش دلوقتي موش وقته
دا فيه أوراق كتير فاضية
وفيه أوراق كتير ناقصة
حاجات ياما ما خلصتشي
وكم بدايات
ما كملتشي
وكم أمنيَّة ، وحكاية
وأشعار في العِلَب لسه
وكم أحباب في دنيايا
وكم دمعة ، وكم غصة
يا ريت تصبر وتستنى
دانا محتاجة لو فرصة
وفيه كم حلم أجهضته
وفيه كم فرض أجِّلته
وفيه كم ذنب أذنبته
وخلِّف حسرة جوايا
فسيب باب الأمل مفتوح
أعوَّض كل شيء فُتُّه
أنا ف عرضك
ومن فضلك
أنا طالبة يادوب مهلة
أطهر بيها روح غافلة
وقلبي الناكر الجاحد
هاصلي ركعتين قَبله
واوجِّه وشي للقبلة
وهاقرا الفاتحة باسم الله
وهاقرا النور وآل عمران
وآية الكرسي ، والبقرة
وسورة الملك والرحمان
وهاستغفر إله الناس
وهاختم نفلي بالإخلاص
وهاشهق آخر الأنفاس
وانا روحي .. بتتشاهد
وانا رو
حي
ب
تت
شا
هد
© 2024 - موقع الشعر