خوي الجنب

لـ محمد جفال، ، في الحكمه والنصح، 525، آخر تحديث

خوي الجنب - محمد جفال

القلوب اللي بعدْها ماتشاوت
ماهي الاولى ولاهي بالاخيره

يا خوي الجنب خل الكوره آوت
واستمع مني وخل المستديره

لاتقول الناس هذي ماتفاوت
والتوامى تختلف راي وبصيره

يدك وحده والاصابع ماتساوت
لاتخلي نظرتك دايم قصيره

لو نطالع بالنجوم اللي تهاوت
ماسرينا والنجوم اصلا كثيره

ولو نخاف من الذيابه لاتعاوت
مابدينا بالمراقيب العسيره

ولو تركنا اللي بأعنتها تلاوت
ماغزينا بالمراهيف الشطيره

اترك اللي لابدا المشوار راوت
ولاتفاخْت بالفكر راي العشيره

لجتمع راي الرجاجيل وتخاوت
في عيون خصومها صارت كبيره

والكبار اللي على القمة تساوت
لاتفرق شملها صارت صغيره !

© 2023 - موقع الشعر