قشاشة الهزل ..!

الشعر روّح مراح مقيط يا ساده.
ماعاد به روح .... مقلوبه معاييره.!!

تحت المجاهير مصداره وميراده.
واهل الفكر صابها من وقتنا حيره.!!

كم نفس تقلط على هداج وراده.
وشدادها يشتكي من غارب بعيره.!!

الجزل ميت وهزل الشعر مرتاده.
جماجمٍ ...... ماتميز في تعابيره.!!

وكالة الشعر .! قشاشه وصياده.
قشاشة الهزل صيادة مشاهيره.!!

الدف يرجف وبلبلها على العاده.
غرّد .... وقامت تهزع له جماهيره.!!

حمامة الوقت ...! للشعار عداده.
مابين شاري وبايع فيه تسعيره.!!

والشاعر اللي تشوفه ماله اراده.
مذلول حرفه ... وماخوذه دنانيره.!!

يادبل كبدي لا قالوا ميّز ابعاده.
ولو ميز الفكر تمرضني تصاويره.!!

للشعر شرهه مابين عيون نقاده.
الوضع بيدنهم ....... حاله وتغييره.!!

الشعر روحه تنازع ماحدٍ فاده.
وهذا الزمن كفّنوا بالشعر تقديره.!!

ماعاد له هيبةٍ مادمتم احفاده.
ولا عاد له طعم بالالسن ولا غيره.!!