باب المدينه

قالوا توجد قلت انا حالتي غير
ماهو يفيد الوجد ياطالبينه

لا طلعةٍ بالرجم في تالي عصير
ولا فزعة اهل الدار مع حاكمينه

عزي لحالي في خفوقي عوافير
قد لي زمن مانيب احس بسكينه

ليلي تفاكيرٍ وصبحي تفاكير
محتار بين الضيم والا الغبينه

لوي احدر ردني طويق والنير
ولوي اسند صك باب المدينه

ولوي اقفي مابالاوضاع تغيير
ولو اتصدر ماللافعال بينه

كنت احسب الايام وضحٍ مغاتير
واثر الزمن دولاب شينه وزينه

كم واحدٍ ممسي يلاحي غنا الطير
صبّحه دمعٍ حارقٍ موق عينه

وكم واحدٍ ظنه يبي يصير ويصير
ولا ذاق رمانه ولا حب تينه

وكم عاربٍ قد فاض راسه سعاطير
ضامه زمانٍ عز به ولد قينه

ماتنومن ياذا الزمن لا حشى مير
راضين بالاقدار زينه وشينه

نصبر عسانا ندرك علومٍ اخير
والا يجينا الموت طلاب دينه