بدع و رد

أسند لي الشاعر: بيان ذياب الحويمضي :
تصفق كفوف المطبّل علی اصوات الهياط

كل شاعر له وحيفه ولانفاسه وزيز
ياقصيدي وانت قوّتك عشر الاف واط

ان شبكتك تحرق فيوز وتنقّز قفيز
لاتلحّقها حسافه ولامنها احباط

الصناعه فاشله فاكتور وماركيز
ماسمعنا فيه بالشعر اساسي واحتياط

لين حطّوله لجانٍ من اردو وانجليز
وانطلق في ساحة الشعر مفلوت الرباط

لين جازت للهلامه واكل كبد  الغزيز
جمهره واعلام واصحون ملا شكول

اطوخلفه دعاية اندومي وشبس وماينيز
وانسحب قدّامه الجزل سحبك للبساط

وانفهق راعيه فهق الدلال بدون بيز
والله ان الجزل ياطا عليهم بالبلاط

لو حكی راع الهزيله وكنّاف الغريز
مايبرّد راعي الجزل لو يلفح اشباط

وانت واحد من هل الجزل ياعبدالعزيز
.....................................

الرد ...
مرحبا ترحيبةٍ كلها عزم ونشاط

صافيه مثل الذهب لا خدوش ولا حزيز
واضحه تمشي عدل ماتعرف الاختباط

حيث ملفاها رفيقٍ سنافيٍ عزيز
شاعرٍ بينه وبين الجزيلات ارتباط

كوكبه بالجوّ بادي وميقافه حفيز
معه دكتوراه اخذها بعلم الانضباط

ظبط الابيات الجزيلات بالوقت الوجيز
والجزاله تعطي الفكر صحوه وانبساط

غيمة الجزله تقل مزن لرعوده لزيز
وانت يابن ذياب لو ضاق خصمك واستشاط

راسيٍ مثل الجبل لا ميول ولا هزيز
يوم شعر الواسطه يعتمد جمع النقاط

شعرك اجتاز المحيطات مايبغى مجيز
خل عنك اللي قصيده تمشّي والتقاط

ينظم الاشعار في برّ والا وسط ميز
القصيده تشبه الكيف نقوه واختلاط

أنت كيفك بنٍّ  اشقر وكيفه بنتليز
عزمك الراسي يوصّلك لاصحاب الصراط

والضعيف من البشر يحترق من لذع فيز
والاوادم بعضهم يرغبون الانحطاط

بدّلوا منطوق (من فضلك) بكلمة (بليز)
زبدة الموضوع لو ينقلب ورقان غاط

أنت مبدع والزم العلم من عبدالعزيز