الجدران

صديقي .. وش على العميان
تمنوّا .. شوفة الأعيان

بعَد ما ابصروا .. في الكبْر ؟
تهزّوا .. ابروعة الألوان

لأنهم .. أسرفوا في الظلم
انا أسرَفت .. في الغفران

يفرّحنا الغريب .. ابفعْل ؟
و نتضايق .. مِنِ الخلاّن

يالين أصبحنا .. نتمنى
مِنِ اللة .. نعمة النسيان

تغافلنا .. لجِل نقدر
نعيش معهم قدِر ..الامكان

و انته أقرب .. لذاتي
معاك أشعر بالاطمئنان

ﻷنك .. نصفي الثاني
بدونك أشعر .. ابنقصان

ف كل من شافنا .. يسأل
يِحَسب انّنا .. اخوان

لذا يسألني ..... الخافق
متى يرجع مثِل .. ما كان ؟

و اذا دارت .. رحى الايّام
شِكَت من شرّنا .. الأبدان

بعَض الاحيان .. تبغي اتبوح
و لا تقدر .. بعَض الاحيان

تحس في الفضفضة.. راحة؟
أحس الراحة .. في الكتمان !

لذلك ...... لا اتلوّمني
ما عاد أقبل .. ملام انسان

ما دام احنا .. تفارقنا
مهب تفرق .. مِنِ الغلطان ؟

يا ليت تكون .. كالأحجار
تراها أوفى .. من الانسان

أبد ما غيّرتْها .. اظروف
مثِل ما هي .. عبِر الازمان

أنا اخشى .. ايي يوم ٍ
و أستبدِلْك ... بالجدران !