طيور الشوق

انا ماجيت باشكي لك هموم القلب وحزانه
ولا من غربة المنفى ولا من قسوة اسنيني

ولا جيت انتقم من حب خلاني بلى خانة
ولا باشكي اموراً سرية مابينك وبيني

اناجيتك حنان وشوق يابو روح فتانة
وجيتك شعر وجداني ليمك شوق يرميني

من اقصى قلبي المغرم سجعت الشعر بالحانه
دخيلك لاتقفي في عيوني لا تخليني

ترى ورد المحبة زان وتفتح من اغصانه
وطيور الشوق غنت لك هوى داخل شراييني

تعبت امن الفراق اللي جرح قلبي وشريانه
تعبت امشي بدربٍ طال يمك مايوديني

تعبت اشيل روح بجوف ليل الصيف عطشانة
تعبت اركض ورى حب(ن) على الهامش مسويني

تعبت اطرد سراب اللال والافكار تعبانة
تعبت امن الخيال اللي من الاوهام يسقيني

فتحت القلب لك وحدك ولك شرعت بيبانه
تفضل مسكنك دايم هنا ياغلا محبيني

سبحت البحر في حبك وكم صارعت حيتانه
وكم ليلة مع طيفك هجوسي لك تسريني

انا شاعر حمام الدوح صفق لي بجنحانه
بيزهر ورد اشعاري وينفح في بساتيني

انا العاشق وذا وردي وذا عطره وريحانه
وذا شعري وذا دمعي وذا همي مخاويني

وذا حبي يصرح لك وذا وزنه وميزانه
وذه عيني تطالع لك ونار الشوق تكويني

عشقتك من مشاعر صادقة وعيون ولهانة
عشقتك حب وجداني عشقتك غيث يرويني

حبيبي كيف باتصبّر على حبك وهجرانه
متى بالوصل تحقق اماني بك تمنيني

انا ضحيت من شانك قطعت افلان وفلانه
انا بعت العمر كله لاجلك يانظر عيني

شربت المر والحالي بخبتٍ مات سكانه
وتهت بدرب اشواقي وحزن القلب يكسيني

انا حبك وبك روحي بليل العشق هيمانه
اهيم بعالم اشواقي ولا به من يواسيني

واحب البحر لعيونك وحب لوله ومرجانه
وانا مانساك ياحبي وانته ليه ناسيني

رسمتك صورة بشعري وبك زينت ديوانه
ومن غيرك بشر ياخلي مزين دواويني