تسليط الاضواء

من شهرة الشعّار ، شفت التعاجيب
اللي عليهم ، زاد تسليط الاضواء

احدً طموحه بالشعر للمراقيب
واحدً طموحاته تواقيع واهداء

واحدً ليا منّه كتب قافه يشيب
واحدً تشيّب لحيته جملة املاء

واحدً قصيده ما يودّي ولا يجيب
واحدً طواريقه تحت قيد الانشاء

وشاعر ليا منْه اشتهر ، زاد بالطيب
وشاعر من الشهره غدى عارض ازياء

وجرّبت من زلّة زماني تجاريب
الصح واحد ، بس يا كثر الاخطاء

مهما كسبت ارضاء اقارب واجانيب
لا بد يظهر لي من .. العالم اعداء

اما انت ياللي يتبع ظلالك العيب
لا تحسب انّك ماكلً كل الاجواء

من صار عندك سكرتير ومناديب
وانا غسلت ايدي من الألف للياء

لو شاء ربّي عالم الجهر والغيب
يعوّد الشعر لمجاريه .. لو شاء

لكن عسانا ما نخيّب ولا نخيب
ولا يتلاشا الشعر منّا الى اشلاء

ما كل ذيبً يشبه محمد الذيب
ولا كل حيٍ بالبشر عالم احياء

بكره يطيبن الليال الغياهيب
والشمس يكشف ضيّها كل الاشياء