ياعمر كافي - خالد المخيدش

ياعمري اللي بخل ماضيّف أحلامي
وإن مرّت بنوم ! قمت وماتحفّيته

كني عيون الغرير ، المنهك ، الدامي
أبسط حقوقي بحلم ! وماتهنّيته

أحس فيني شعور يجدد آلامي
ماكل نورٍ يقلّطني على بيته

ياعمر؟ لولا العطش ! مايركع الضامي
ولولا الحياء ! كان ثوب الصبر قطيته

ياعمر ! كافي ، ترى ملّتني أوهامي
أحفيت رجلك ورانا غيّ ، وأدميته

أشوف حسناك قفوي وإنت قدامي
ياما تهقوت عيون اليأس وأبكيته

يشربني الهم دم ، ويأكل عظامي
وأنا على مايبي طعته ولبّيته

تطول لحظة بقاه ، وتقصر أيامي
والكف يصفق بأخوه إليا تباطيته

هذا زمانٍ يساومني على آثامي
وأنخى ضميرٍ يشيلن لاتعزويته

خلّك مثل ماأنت ، ضلعٍ ، راسيٍ ، زامي
تبطي صدوف الزمن ماحدّرت صيته

وإن ضامك الوقت ماضاموك الآنامي
لو كل حيٍ على الدنيا تحدّيته

ممكن يخون الخوي وأخوّن أقدامي
بالذات لاشفت شيء يعيب ! خليته

أما أني أكفر بعاداتي وبإسلامي !؟
هذي اللي أموت ما والله سويته

© 2023 - موقع الشعر