اليوم ظهره غير واطلالته غير
والواضح انه غير حضرة جنابه
شمسه بدت مافتحت له نواوير
والفي والرمضا بحضنه تشابه
سحايبه تقبل بليا تباشير
وعواصفه تضرب ولا احدِ درى به
بالمختصر لاصبح لاظهر لاعصير
اطول دقايق شفت تنضح رتابه
ياصاحبي لو انها بك مخاسير
بقولها من باب رد الأجابه
اقبل ظلام البعد تصبح على خير
شوي شمس القرب تعلن غيابه
آخر مواعيد الغلا والمشاوير
وأول دروب البهذله والكآبه
الى متى تخطي وانا اقبل معاذير
ونفس الخطى ترجع تعيد ارتكابه
والله لو انك تملك بنوك تبرير
من جاء يبي بعدك عذر مالقا به
بالكذب لك مصنع اعادة وتدوير
يرسم على الباطل ملامح اصابه
ظنك تمشيها على الكل وتصير
بعيونهم رمز الذكاء والذرابه
لكن تراني غير يابو الدنانير
لاتعتبرني ضمن صف الغلابه
انا عقاب ان كان عرفك عصافير
افج بالجنحان صدر السحابه
اجابه التيار باصرار واطير
واسمو الى حيث السعه والرحابه
واسكن قمم في عاليات المشاهير
لو كان غيري تهتويه الخرابه
اهلك ضما وانا على النبع لاضير
ولا اشرب منه ان كان غيري وطا به

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر