مواعيد مفتوحه

انا من مواري ضيقه البال وين اروح
وانا اشل قلبٍ ماتخلص من اجروحه

اعامله مثل امعامل الفارس المجروح
تناسوه ناس ٍ دونهم مرخص ٍ روحه

كفى يازمان الحزن في صوتك المبحوح
تعلمت منه ادروس مهيب مشروحه

اواجه مع الساعات هم وزعل وجروح
إلى وين باصبر والمواعيد مفتوحه

الآ ياحمام الدوح وين أنت قبل الدوح
قبل تضرب الامثال في نجد واطروحه

وانا باسئلك وش علمك ياحمام النوح
على غيبه اللي غاب والروحه الروحه

عليك الزعل ممنوع دام الخطا مسموح
وانا لو عليك ازل مهيب مدموحه

تكلم على كيفك وخل الصفر مفتوح
لك الله سرك لو تماديت مابوحه

تعلمت كتم السر مثل الرسم في اللوح
ولا تفضح الالوان وش تعني اللوحه

ولو ضيقه الخاطر يجي سرها مفضوح
احاول اخفيها بنظرات مفضوحه

وإلى من لفت ياويل حالي متى بتروح
لو السالفه لحظات واتروح مسموحه

وانا ويل قلبي كل ماجات وين اروح
تعبت اكتب الكلمات بحروف مجروحه