مايعيش الا كتوم

ايه بكتب لك قصيده وأنتقي أحلى كلام
جعل تبقى ضحكتك ياصاحب الاحساس دوم

الغلا حاجة جميله مفعمه بالاحترام
والاحاسيس الغريبه تجعل الارواح توم

بس هذا حسب علمي من قبل عشرين عام
يوم كان الناس تدرك ان وقت النوم نوم

وصبحت دنيا الحداثه ماشية عكس النظام
وعكس تيار الحياة ايموت من حاول يعوم

صار للانسان فرصه جاهزه للاغتنام
ماترده كون شيمه كان يطري له يشوم

ضيقتي من غير هم وضحكتي دون أهتمام
كل شي صار كذبه في الزمن حتى الهموم

عش حياتك مثل ماهي لالزوم ولا التزام
كان ماحصلت فرصة سانحة تقضي لزوم

لاتلوم اللي تشوفه لايلوم ولا يلام
لاتعاتب بالدقيقه لاتدقق بالعلوم

لا تسلم وأنت قصدك تنتظر رد السلام
ردة الافعال كوم وصدة الايام كوم

من يهم لهم هايم في دروب الهم هام
والعمر مهما تشوفه كل يوم يروح يوم

بالذهب يوصف سكوتك وأنتبه مسك الختام
أخذها مني نصيحة مايعيش الا كتوم