وداع الغالية سمّ الهواوي

وداع الغالية سمّ الهواوي
يجيب الموت ويعجّل دنوّه

يكنّه حط وسط الكف كاوي
وفجّر بين ضلعانه عبوّة

فقيد الخل وان جيته تداوي
يجوز إنك على حاله تأوّه

ليا شلّع بها الطير السماوي
حبارى والوحش عكّر صفوّه

ولى من جاور الغيم الرهاوي
دخيل اجواد بحماهم تجوّه

جسورٍ عادته ضرب الكلاوي
مطاريقه يحوش بها عدوّه

يعرفونه وهو شاعر عزاوي
وإسمه مثل نجمٍ في سموّه

وهو لى شبّ طاروقه لظاوي
من العبرات ما عاد ايتفوّه

ألا يا ليت صيته للنعاوي
ليا من بان وسط الناس سوّه

تقول ان الدهر شيخٍ سطاوي
على الأفراح ياخذ منْك خوّة

لو ان الوجد ياتي بالتساوي
خذيت اللي خذاه وزان جوّه

عرفت الحين ليه الورد ذاوي?
على غيابه ترى وقّف نموّه

عليك اليوم شرهات الدعاوي
ودرب البعد يالمحبوب طوّه

ظروف الهجر ما فيها تَقَاوي
ولا تنفع بها زنود الفتوّة

عيوني خيّبت كل الرجاوي
ليا منه ورا الغيمة تموّه

تشمّت ما تشمّت يالفضاوي
أنا قلبي على بعده تشوّه