يــا مـوتــري

يا موتري جاك الطلب والوعد حان
وأنت الحشيم اللي وصوفه تعاجيب

فخر الصناعة هندسة عقل يابان
ومن الفخامة زودوله بأساليب

منوة بعيد الدار وقت المسيان
حضرة جناب الجيب خال العذاريب

للموجبه شاريك يا غال الأثمان
والله يبعد عنك شين العواقيب

نبي نلبي دعوة الخال ضيدان
ويستاهل العنوة زبون المطاليب

يستاهل العنوة سلايل كحيلان
نسل الرجال مكملين المواجيب

اللي لهم في صفحة المجد عنوان
وتاريخهم معروف شرق وتغاريب

رفيقهم يجزا احسانه بالاحسان
وألا العدو يبشر بعوج المشاعيب

أهل المواقف يوم زوغات الأذهان
وأهل الفعول الي تضد الأجانيب

يشهد لهم في ساحة الحرب فرسان
يوم العزاوي عند حرش العراقيب

ويشهد لهم مذلّق الشلف والزان
وحذف الجنايز للسباع المراقيب

وكان الشجاعة عند الأبطال برهان
ترى الشجاعة تنحني لهامة عضيب

له عادةٍ يثني ليا قيل يا فلان
يرم العشاء لمعكفات المخاليب

مع سربةٍ ترسي ليا ثار دخان
بمشوكٍ جاله في الأعداء تجاريب

لاد القريشي من على عهد الأزمان
كم من عدوٍ كدروله مشاريب

من ماضي الدنيا هل سنان وعنان
والبل حموها بالرماح المعاطيب

أمدح فعايلهم ولانيب غلطان
ربعي خوالي زاد طيبٍ على طيب

واليوم ألبي دعوة الخال شفقان
ويستاهل العنوة حصان الأطاليب

ملاحظة : عضيب المذكور في القصيدة هو
فالح بن مسيلط القريشي السبيعي

من أشهر الفرسان الذين أنجبتهم قبيلة سبيع