صرخة نازح ..! - فاهد الرشيدي

ياليل النازحين اقصر من إخطاك
عبوس(ن) وجه صبحي ما يطمن

ياليل اعكف ودثرني بظلماك
جروحي سامرت نجمك و شمن !!

انا فاقد وطن والحال .. عيناك ؟!
ثلاث سنين من فرقاه تمن

حضني في بعاده سور واسلاك
بقالي منه طيفن ما يسمن

خذلني من ذخرت بدور الافلاك
هلي من كنت وقت الضيق اضمن

تواروا .. وانزفوا عزل ضحاياك
تقل ما بينهم سني و مؤمن

وطن وان شككوا في حبي اعداك
ترى حبك بوسط الجوف يكمن

جرى مع دم عاشق هام بهواك
عشق ريحة ترابك حيل و ادمن

ترى لي قلب ضيعته بفرقاك
سنة ماجتاحني غدرك و هيمن

ياليل ارهق ضياعي صبح مسراك
حفايا هالخطى تاهن و دمن

متى تزف لي ياليل بشراك ؟!
وابوس خدودك الايسر والايمن !!

يارب اكشف دجى الغمه برحماك
الى من غيرك اتوسل .. الى من ؟

© 2024 - موقع الشعر