عنـدي نصيحـه - خالد بن نويفع السميري

ياسامعين القاف عندي نصيحه
عسى النصائح في القلوب تريع

وهرج الصواب عن الخطا نستدل به
والرابح اللي للصواب مطيع

الناس واجد والكلام قليّل
وموزعن مابينهم توزيع

يوخذ منه ماطاب للي يطيب له
ومازان من طيب الكلام نفيع

ومبدا كلامي نختصر كلمة الحق
ونقرا فوايدها على الجميع

يفوز صاحبها وتفرح ضمايره
نهار فيه يشيب الرضيع

نهار توزن سيته وحسناته
يوم اللقا في الموقف الشنيع

ومن غر في دنياه عن كلمة الحق
وفي مايضره يشتري ويبيع

الكلمه اللي ترضي الله يهابها
وهرجه على غير الصواب مذيع

ياجب عليه يتوب توبة مخلص
ترى المنايا مشيها سريع

واليوم كلن يقتدر في تصرفه
وباكر تضايق خطها الوسيع

ماقدمه ألا حفرة القبر مظلمه
وموضعن في وسطها توضيع

ويبا يوقف قدم ربه ويسأله
لكن معسر واللسان قطيع

لاخير في من يجتنب كلمة الحق
ويصد عن حبل الله المتيع

ولاخير في من يسقط الحق بينهم
ومن بينهم حق الكرام يضيع

مطلع كلام الحق ماهوب حولهم
عنهم علاماته تذب الريع

وسو النفاق وشين الاخلاق عندهم
ومولعن في وسطهم توليع

ومن تاع منهم في الخطايا ودربها
ماحدن بقايله وراك تتيع

يجاملون اللي على منهج الخطا
ويصافحون المنهج الرفيع

ماهمهم سيات بقعا وقربها
ولا فكروا في جورها اللكيع

يقوله اللي قبلنا في مثايله
سيات بقعا مالها وديع

الله يكافينا عواقيب شرها
ويجعل لنا من دونها منيع

يمنع جوارحنا ويبعد لحومنا
عن ماقفن فيه الحديد يميع

وصلاة ربي عد من صام وافطر
على نبين للعباد شفيع

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر