اول كلامي مبداه ذكرت الله واخترناه
ماننسى ذكر المعبود مثل اللي ذكره ناسينه

عسى الله يغفر زلتنا وبغيثه يرحم ديرتنا
وعسى دعوتنا مقبوله راجين الله ومطيعينه

ياديرتنا يوم امحلنا ماجتك ذنوب الا منا
ذنب الخلق يعم الديره عسى الله ينهض لك عينه

اول مابه صيدك راح مايوجد له فيك مراح
حتى ضبك فيك اشفاقه وجربوعك عنك مجلينه

اسباب الخلق وطعنها في عرض الغايب بالسنها
يبعد عنهم رحمة ربي لون الفرض مصلينه

لو لحاهم شوشة هول فيها العرض فيها الطول
اللحيه ماهي بقطاره الدين بقلبن وضغينه

ياديرتنا حل المجلى عنك العالم تمشي عجلى
اللي شرق واللي غرب ومن قعد بك لاتجفينه

لابد المزن مساقيك وعقبه تحيا نواميك
عسى يسقيك بودانه نون تمطر ودادينه

ثمان ايام يساقيها نون ودانه يحييها
يخضر بالارض المذنوبه من جرم الناس المسكينه

ناسن من شين اجبلتها ماتقدر تبري ذمتها
سو النفاق مشاركهم وطريق الحق مخلينه

ترغب زبر الهيلمات وجبلتهم ود وهات
وهاذي عادات المغرور تلهيه الغفله عن دينه

ناسن تدفع مساهمها على فرقى قدايمها
حتى البزر اللي مولود باسمن مشبوه مسمينه

ماعبّد محدن يبغاه وماحمّد محدن سماه
واسمى الخوارج ماجوده ومن خطرهم ماجا زينه

من يرغب دارن يمشيهايصبح سارح وامسا فيها
ومن يرغب قوم اصبح منهم ولازم ياخذ منهم عينه

ياخذ منهم تقاليد ويوالفهم ولف الصيد
قرب لي خمسه من خمسه ويمسون العشره من طينه

من هالاعمال المختله تدخيل العامل في الفله
داره ورى سبع دول واصبح منها مشتالينه

جابه شياله مشتاله واصبح سواق ام عياله
وقال الها هذا سواقك يمشي من حيث اتودينه

عطيته مفتاح اصغيره لكنك عندك تدبيره
جبته من جملة عمال وهذا منهم منتخبينه

يقضي لك مقاضيك وامشي من حيد ايوديك
وان ماعرفتي ترجمته عب اشهرين اتعرفينه

وليا منه زل اسبوعه نشدها وشلون اطبوعه
قالت سواقي حبوب ومن خفة نفسه راضينه

انا احسب انه لبناني واثره جا من باكستاني
لاجتني في من جانيبه امسلينا و مسلينه

يجيني حين اناديه وان مازحته قال اوكيه
وحبيته والله من قلبي حتى البزران محبينه

خله لاتطري مرواحه ماساع اني ذقت الراحه
حتى انت بقلبك مرتاح لو تسافر للمدينه


تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2020 - موقع الشعر