وا وجودي

ألا وا وجودي وجد من عقب التسعين
وسيع البنايد مير الايام متعبته

وسيع البنايد يوم وقت القسى واللين
يوم انّه مشبب والليالي مشببته

لكن أنتهى وقته وعوّد مع التالين
رجع في حياةٍ لرذل العمر قربته

ويبا وقته اللي قد مضى له لكنّه وين
مقاديمه اقفت والتوالي مشيّبته

بناته ثمان أحسابهن والعيال أثنين
وشواري عياله فيه ماهيب معجبته

على كل واحد فيه رمس الخمال إيبين
تعب فوقهم مير المهابيل خيّبته

دباديب لا حفظان دنيا ولا من دين
يميع الولد فيهم تميّع معزبته

سوات الهرافا اللي على حب ومربين
شحم كل واحد في علابيه وذنبته

وبعد عاف منهم يمتني ربعه الغالين
يبا الرفقه اللي في آخر الوقت غايبته

على اللي اليا منه شبح لي بنظرة عين
ابا اونس سهوم العين بالقلب صايبته

رمتني سهوم العين من نابي الردفين
تهاوت على القلب المعنّى وصوّبته

لطيف الحشى اللي منه قلبي غدى قسمين
أخذ منه قسم وقسم الاضلاع قاضبته

راعي لبّةٍ تشدي قمر عشر يوم يبين
اليا شيف نوره بان والسحب عاقبته

والا ياوليفي عنه ضلعان شعر أيمين
لونّه يباع وينشرى بالثمن جبته

لكنّه وراه ودونه اللي نسمهم شين
وطنهم عنه كل المخاليق هايبته

جوابه لبن وضحاً رعت في طرف عرنين
وصكّت على عردان عقب التحم نبته

عليه النزوع الاوله من قديم الحين
وتقفاه هجّال الودادين وارغبته

وطلع به نباتٍ مايجونه رعاة الضين
على حيفته راع الغنم ماوطى سبته