تمر و شاذلية - فلاح العبسي

وحيد .. مع ضي البدر فوق مرقاب
اتأمّل الصمت و نسايم عذيّه

سافرت مع فكري كما طير مرتاب
وفي كل مينا : قصّةٍ جرهديه

(وتاخذني الذكرى على دار الأحباب
واظهرت ونّاتٍ بصدري خفيّه )

واهيم في مشهد لقانا والاعجاب
يوم العيون تبوح : شوق و تحيّه

الحب عذري والجفا ماله اسباب
مير القدر يحكم بليّا قضيّه

واعود من ذكراه والدّمع سكّاب
من فوق صدري والمدامع سخيّه

ياليت جنّبت الفكر طرق الأبواب
مير الفكر ماهو سواة المطيّه

شاب الشّعَر والحزن يكبر ولا شاب
يدوزن الصدر و يغنّي : ضحيّه

الهم : مجلاسي ،، و ذكراه : الاعراب
والصّمت : تمره ،، والصبر : شاذليّه

بحاول اتناسى .. واذا قيل : كذّااب !!
كذّاب انا دام الحقيقة رديّه

© 2024 - موقع الشعر