يادار - خالد بن نويفع السميري

يادار وين اللي على الله خلفهم
الكل منهم عنك قفت ضعونه

قصاف الانفس عقب كانوا قصفهم
مافيك منهم واحدٍ يذكرونه

ربعٍ ضعيف الجنب يتبع سلفهم
وعن اليدين الطايله يحتمونه

اليا تمكن منزله من طرفهم
يحرم على طلابته ياصلونه

وعلى دروب الطيب كلٍ عرفهم
طيبٍ على جدّانهم يارثونه

وبقلوبهم حبل الصداقه كنفهم
ساس المودّه بينهم يزرعونه

اليوم ما اخبر واحدٍ قال شفهم
يمشي ضعنهم والحيا يتبعونه

اليا بدّر الوسمي وبرقه شعفهم
وتوهّفت صوب القياسر مزونه

الدغر يشحونه وغاية هدفهم
المطرح اللي ثنوت الركو دونه

ربعٍ اليا من الموصف وصفهم
اللي يبا ميصالهم يتعبونه

اليا ذكرناهم سقى الله حشفهم
مع عالمٍ جت علّته في بطونه

خطلان الأيدي جت بعدهم صففهم
يولّفون الهذر ويجمّعونه

ومن قولهم صم الرواسي علفهم
ولو البحر قدّامهم يشربونه

اليا شافوا اللي يستعز بشرفهم
سو البريّه حل فيهم بشونه

ويفضلون عن المعزّه ضعفهم
وسبل التفرق بينهم يرغبونه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2022 - موقع الشعر