خليتك انتي كل شي - زياد السنباني

شاب الورق من يوم غبتي ... وانحنى ظهر القلم
 
واشتعل راس الزمن بالشيب ... شوق لجيتِك
 
 
 
وتبعثرت أيام لجلك كلها حسره وهم
 
لا هي اقدرت لحظه تنسيني ولا هي جابتِك
 
 
 
كل الجروح توفقت باوقات نستها الألم
 
إلا جروحي كلما النسيان جاني .... خبتِك !!
 
 
 
هذي الحقيقه والهوى غلّاب...ووجودي عدم
 
تايه بدونك كل همي ((ليه طالت غيبتِك؟))
 
 
 
صعبه ألملم حسرتي وارمي الأماني للندم
 
والأصعب ألقى شامت(ن) ويقول ((وين حبيبتِك؟!))
 
 
 
وانا الوحيد اللي جرحتي كبرياءه...وابتسم
 
وانا وبس اللي مسح يوم انقهرتي دمعتِك
 
 
 
وانا الوحيد اللي طلبتي المستحيل وقال تم
 
وانا وبس اللي جرحتيه وجروحه حبتِك
 
 
 
حنيت لك واشتقت لك يا جرحي اللي ما التئم
 
حنيت لما ذبت لكن ... ما بدت حنيتِك
 
 
 
ما قلت لك في يوم (لا) .. وانتي ولا قلتي (نعم)
 
يا كثر طيبه قسوتي ويا كثر قسوة طيبتِك
 
 
 
خليتك انتي كل شي ... (نفسي) و(خصمي) و(الحكم)
 
ورضيت ظلمك قبل حكمك دام هذي رغبتِك
 
 
 
راح العمر ... ما همّني لو راح .... لكن الأهم
 
مقدرت أنسى فيه يا ((بنت الرياض)) محبتِك
 
 
 
بقلم // زياد السنباني
© 2024 - موقع الشعر