حاول مرةَ أخرى - زياد السنباني

((مدخل))
بقلمي //زياد السنباني
تمر ف الحلم .. واصحى خايف ومنكوس
واحس بالرعب .. واتعوّذ من الرؤيا
شفت الزمن كيف خلى شوفتك كابوس
من بعد ما كنت اغلى شي في الدنيا !!
******
******
((حاول مرةً أخرى))
بقلمي// زياد السنباني
 
ذكراك راحت خلاص وصادها النسيان
وان زارت البال تبقى للأسف ((ذكرى))
 
ذكراك وش هي سوى ((دمع وألم واحزان
وهموم ما تنتهي وجروح ما تبرى))
 
خل المواجع تنام وجرب الحرمان
وانته بكل المواجع والجروح ادرى
 
ساري ومسراك درب الصد والهجران
خليك ساري و ((سبحان الذي اسرى))
 
لاتنتظر ذكرياتك في مدى انسان
كان الوله والوفا ((غلطاته الكبرى))
 
لازم يموت الورق ان فارق الاغصان
 
ويصير بحر الغلا عند الجفا صحراء
 
 
لو كان ما للفراق من العذاب الوان
ما صارت الشمس عند غروبها ((حمراء))
 
 
في باب قلبي كتبت لرجعتك عنوان :
((ما حالفك حظ ... حاول مرةً أخرى))
 
 
((مخرج
)) بقلمي// زياد السنباني
مهما تحاول تكون انسان ما تقدر
وكل من يشبهك له روح خدّاعه
اوفيت خمس سنين من طيبتي واكثر
وانته زياده عليك من الوفاء ((ساعه))
© 2024 - موقع الشعر