ياربعنا - خالد بن نويفع السميري

الليله امسيت كاثرة ٍ طواريه
الله على طيب الإعمال يهدينا

أهدافنا فالحياة أعمال خيريه
وصل الأقارب عليه الله موصينا

لكن جتنا سلوم ٍ هيلمانيه
حنا واهلنا عليها ما تربينا

حيث انها عن سلوم الطيب منفيه
نبا نوحد عليها قبل تصغينا

ياربعنا راحت الرفقه حزازيه
نرجو عسى ماتورثها نشاوينا

والا الكبير ابتدا شره بدخليه
يمشي على خطة ٍ ماهيب ترضينا

والرفقه اللي ماغير اسلوب كرشيه
ومحبة القلب لافيكم ولافينا

هاذيك زيلت شجرة ٍ مالها فيه
انتم وحنا عليها ويش حادينا

ما تشترك بالشكاله والعروبيه
والى مشينا عليها من تردينا

العام مكتملة ٍ فينا الرجوليه
واليوم في بعضنا ضاعت هقاوينا

الى صار نمشي دروب ٍ مغلطانيه
عن درب الاسناع وين الله مودينا

حياتنا نعتبرها الصبح ملغيه
عند أخرتنا ماندري وش يلاقينا

لا ترغبون السلوم المشبهانيه
تفكرو ويش قافيكم و قافينا

الطيبه نعتبرها راس ماليه
حظو عليها وسمعتها تكفينا

تغانموها ترى الارواح مقفيه
الى فاتت الاوله ماعاد يمدينا

وان كان رحتو علينا في ابعد النيه
رب السماوات مطعمنا ومسقينا

مناكب الأرض نمشيها غناويه
عن من تصاغو لاسام ٍ غير اسامينا

واللي يبا يبتعد لايطري الجيه
يبعد مشاحي ضعونه عن مشاحينا

وان حل وقت الصرد بأيام الاسديه
ياكيف ندفي رجالا ما تدفينا

مادام حبل السواني ياسم الطيه
مانعتبر به نطشه عن ضوامينا

ولا نشتقي به مازال أنفوسنا حيه
وصية ٍ من على أولنا لتالينا

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر