قمرا النفود:

قمرا النفود أطرب لهاجس مساها
مع فزة الخاطر على نَو ممساهْ

والبدر فوق الرأس ينصف سماها
وسط الشهر قمراه في عِزْ مسراهْ

تنوح له ورْق المشاعر غناها
من هاجسٍ يطرب على نوح ورقاهْ

يسري بي الهاجس عساه وعساها
والشوف يرمي لي من البعد بشراهْ

يجمع شتات حروف عمري هواها
وإلا على روس الطعاميس يذراهْ

مثل حلاة الرَّوج جمرة غضاها
والْمَيْش ما بين البراخيص تازاهْ

وذيك النوازي بين زامي وطاها
تزهي على زاهي قمرها ويزهاهْ

أحلى من الدَّرة على ما سواها
سبحان من سوى قمرها وسواهْ

صورةْ يماريها البهاء من بهاها
في عرس صحراها على نور قمراهْ

جيت احتويها صرت أنا محتواها
فيني تجسد قيس ليلى وليلاه

يعزف لي (الوحيد) وأرقص معاها
وأروح بالموال مرات وأنساه

بالصدق ما أنساها ولا من نساها؟
لو لحظةٍ ما نيب في الطبع وياه

يا ما السَّحر يبلج بحُمرة شفاها
مح طلعة النجمة على هَمْ فرقاهْ

حين ارتوى معشوقها من ضماها
من قبل لا تصلاه شمسه ورمضاه

اقفا يجر خطاه واقْفَت خْطاها
للشرق ممشاها وللغرب ممشاهْ

ذكراي ؛لو في ذرة ٍ من ثراها
حزات قمرها يعانق ثرياه

أحسها لجروح روحي دواها
وأشمها مع نسمة النود ذكراه