يفطر على الخمر !: - شائم الهمزاني

على الهوى ما هو لنا النهي والأمر
النهي نهي الله والأمر أمره

لا يحسب إنه كاسبٍ غاذي النمر
الخاتمة جزواه يا كلْه نمره

من عقب ما هي بهجته تغْمره غَمر
ندمان وأحزان التعاسة تْغَمْره

في مثل من يغوى هوى البيض والسمر
ويروح ما له بين الأرقام نِمْره

وشلون يعصي الله في تالي العمر..
اللي على الطاعة مضى كل عمره؟!

من صام لله ، كيف يفطر على الخمر ؟!
ما يلتزم سنة نبيه بتمرة ؟!

والنار من يلعب بها تدمره دَمْر
لو أعجبه صفارها فيه حُمْره

وخصوص لا من صار وقودها السمر
من حولها السمار بالليل سمره

لربما من تحت رمادها الجمر!
مازال بوجاره رماده وجمره !

ما هو هياط أهل البجاحة ولا الزَّمْر
في مدعين الخير وأشر زُمْره

حفارةٍ للسوء والخير بالطَّمْر
يخلون حلو التمر يصير خَمْره

والعقل لوثوه بالزيف والقَمْر
لأهل البصاير والبصر شر قُمْره

تشوفهم لاستنفروا كنهم حُمْر
مساعي أهل الخير يبغون دَمْره

© 2024 - موقع الشعر