ياكثر ماحبك - وياكثر مغليك - محارب العنزي

ياكثر :- ماحبك وياكثر مغليك
حتى الخطاء :- منك انت له طعم ثاني

تجرح خفوقي ودمح الجرح واجيك
واقول داره :- ياخفوقي عشاني

انشهدني بالغلآ:- راحتي فيك
وانشهدني :- من (غرامك ) اعاني

حيرتني مابين ( احبك ) ومابيك
ولعثمت حتى بالمحبه لساني

استغفر الله صرت من كثر مابغيك
اكذب واقول بغيبتك (تو جاني)

حتى وانا اللي من هنا الحب معطيك
اقول هو اللي بحبه عطاني

جرحك / طعونك / كبريائك / بلاويك
كل شيء لك :- رغم الوجع زعفراني

كن العسل (خنجرك ) والسكر ايديك
لبى الزمان اللي بحبك رماني

ولبى شفاك / وريح عطرك / وخديك
ياشيخ اذوب :- من الحلا في مكاني

خذني معك عاشقك / ولا مخاويك
ولا معك خذني / طموح واماني

وان خنت بك وانا من الحب شاريك
ياجعلني للموت - ولا عساني

وان قلت لك بنساك ..؟ ماني بناسيك
والله لو حتى خفوقك نساني

وشلون ..؟ بنسى وانت من كثر مغليك
حتى الخطاء منك انت له طعم ثاني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر