أبـر تخدير .. !! - محمد الشمراني

صباح الخير .. مدري أي صباح يكون فيه الخير
وحال الناس مختلفه .. ولا به شيء متساوي .. !

عربنا من عرفناهم .. نلاقيهم بعكس السير
يسير العالم بكبره .. ونرجع " رجعة الغاوي " .. !

غريبه يا عرب .. وشلون ما نقوى على التغيير
تكبّرنا على عاداتنا .. يوم العقل , خاوي .. !

كذا حنا .. نفكر دون ما نتعب على .. التفكير
نبي كل شي ياتي بالسهل .. يوم السهل هاوي .. !

وأخاف الله يعذبنا .. ويحاسبنا على التقصير
بعد ما صار بالواقع .. جهل دين .. وجهل راوي .. !

نصدق كل ما يطري .. بلا عذر وبلا تبرير
ولو قيل " الجمل عاوي " .. نقول أن الجمل عاوي .. !

عقول ٍ للأسف صارت .. تحت رحمة .. " إبر تخدير "
تخدّر عقل .. بأسباب الركود .. ونيّة الناوي .. !

جلسنا في متاهات الدجى .. حتى غدينا .. " غير "
ضربنا للسكون أمثال .. يبقى للعرب .. ضاوي .. !

حسافه .. " جفّ بير العزّ " ما عاده يسمى بير
تركنا عزنا مثل الكتاب .. اللي غدا .. طاوي .. !

على كل حال يا جعل .. المساء والصبح دايم خير
وأنا أدري .. دربنا أعرج .. ولا به شيء متساوي .. !

© 2024 - موقع الشعر