لو زين بنت البدو يشرى وينباع

ام العيون اللي كما عين طلّاع
تشدني بحلم العيون وغضبها

صف الرموش اجيوش قومن وتباع
نطيعها كل ماترفرف هدبها

هي شيخة الخفرات زينات الاطباع
فيها الحيا من فطرةٍ تكتسبها

ياحلو شوفتها بروضن ومرتاع
لادوجت قامت تجمّع حطبها

بنت البدو من طيبها صيتها شاع
ماكل رجّالن يجيها عجبها

واليا بغاها كل هافي وطماع
من دونها ارجالن تعكّف شنبها

لو زين بنت البدو يشرا وينباع
كان الحضر قامت تبيّع ذهبها

مالوم قلبن في رجا كسبها ضاع
مال الثمينه كود قرمٍ كسبها