يا كرسي أبو دولاب - دحام المنور الخالدي

ياكرسي أبو دولاب رب البشر موجود
كفيل (ن) بعالي كعب يصبح تنقالي

بفرقاك عيد العيد مشكورن ومحمود
مشيت الهوينا والحجل ينطح الجالي

وأساير بنات الجود والراعبات الخود
على سوق (أبو نواس) ودتني آمالي

ولا من رهيبن وز لي النار بالبارود
ولا من رقيبن يحتريني ولا والي

أعانق هوا العليا مع كل هبة نود
لو استمطرت راس النعامة بالرمالي

إذا غيري كفوفه يجي مدها محدود
ولو الغيم ما طالوه فالنجم ينطالي

تراني حكاية حب عدت على المسهود
وأنا بحر ما يقوى على شيلة احمالي

أنا مرتع الزين الغلاوي ووضح الذود
وأنا عيني الرضوى وطيب العشا فالي

أنا عز إسم(ن) شاله الله عن المنقود
كما شيلة ابراهيم من لاهبن صالي

يا كم واحدن مابين أهله وهو مفقود
وكم من فقيدن كان أغلى من الغالي

ترد القصايد صوب دارك تقل مطرود
عجولة وتشكي من عصاي ومن اقوالي

أثاري صواب النار لو ينفجر بحشود
يجي مثل فرقا ديرة ن تسكن اوصالي

أنا منيتي آآآزور أم الحجار السود
ولو فجروني واحرموني من ظلالي

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر