بـيت الشعر في الروض يازين مبناه - حنس بن سعد الذيابي

ياسعود ياوجدي على البر وجداه
وجد اليتيم اللي تردت اموره

بيت الشعر في الروض يازين مبناه
ليا صار في جون تطارد زهوره

جاه الربيع ومقدم الصيف ما اخطاه
ومن تالي الكنه تملت حضوره

فيه الجهام اشكال مجهم وعفراه
ماصلفقه عبد يضيق صدوره

بدو هواهم شوف نبته وخبراه
وكل حليب ام الحوير فطوره

واطيب من اللي باع ذوده وخلاه
طاوع حريمه وانثبر في قصوره

والبر مامثله ليا طال مرعاه
وحبه بقلبي زايد عن حكوره

ليا صك نبته والهواء الزين يذراه
وراعي الغنم زاد اللبن عن قدوره

وكل ابلج من طيبة الربع شفناه
ماحسن اللحيه ونكس شعوره

في مجلس راعيه يفرح بمن جاه
مجرب مافيه نسب يعوره

واليوم حتى جارنا ماعرفناه
مقفي ولاياصلك عدة شهوره

وليا نشدته قال الاشغال تحداه
وقت المجالس راح واقفت عصوره

والوقت توه زان من كل مجهاة
والله يعز الدين واخوان نوره

نعمه وامان وكل شي وجدناه
وجابو لنا الطيب من ابعد بحوره

مير البلا في الناس بين وشفناه
كثر الحسد والخلق كثرت شروره

واللي شبع ماعاد يذكر دناياه
ماجاه برد ولا يعرف الحروره

والرجل مايمدح على شان دنياه
المال يفنى والفعول مخبوره

© 2022 - موقع الشعر