ولد الفقير

من لا تغانم يومه باول نهار
قال المثل فاته من الدنيا كثير

لكن بكرنا ولا فاد البكار
الوضع من سبت هل الفوضه عسير

ماني مدور للمشاريه اعتذار
لن اعتذاري ما يصدقه البصير

مكتب من سبوعين ماليه الغبار
غاب الموظف و نشغل عنه المدير

مدري على اي اساس واقهم يدار
مديرهم ما هو لدايرته يدير

للمعرفه والمصلحه مخلص و بار
باع الضمير و ما يهمه وش يصير

وابن البلد لازم على داره يغار
والمؤتمن لازم يراعي للضمير

لكن كلا الاثنين ما فيهم خيار
وشلون والواقع من الواقع مرير

الحال في المشفى مثل حال المطار
لاحاصلن كرسي ولا حاصل سرير

مغير بس اشبع تامل وانتظار
والدور ماشي وانت ثابت في الاخير

لا صار مالك من وجاهتك اعتبار
ماحاصلن لك الدور والله لو تطير

الانظمه تموت في حب الوقار
وتحقد ليا شافتك يا ولد الفقير

الحال مايل يا طويلين العمار
ميلته كلن شافها حتى الضرير

نبني وطن و نمد في طول العمار
لكن واقعنا من الداخل خطير

موتت مبادينا تهدد بنهيار
لا جاك يومٍ ما يفيد ابه النذير

يادار احبك لو سكنتك بالايجار
ولو كان ماجاني من الخيرات خير

ما فيك لي منصب والا ثروة عقار
منسي ولكني عليك اخشى وغير

تقبلي نقدي و لو ثقل العيار
انا ابنك اللي حبك بدمه يسير