يمكن اغيب وغيبتي يمكن تطول

يمكن اغيب :- وغيبتي يمكن تطول
ويمكن اغيب ولا يطول غيابي

ويمكن تمر ايام وشهور وفصول
وانا من الهجران :- مقفول بابي

ويمكن يحصل رقم مغليه مقفول
ولا عاد يلقى كود باقي زهابي

ويمكن اتوه بضيقتي منه واجول
والشوق يذبحني واموت بعذابي

لكن قبل ماغيب يادار باقول
بقولك :- حاجه ولملم ثيابي

تكفى ليا من غيبتي كملت حول
ولا جاك منهو بالغلا مادرابي

واصبحت من بعدي عن الناس معزول
ولا حدن سئل في غيبتي عن جنابي

اترك على العنوان له كم مرسول
يمكن يحس بيوم ويدق بابي