محتاج اغيب ! - محمد الحيص

محتاج اغيب و اترك الناس للناس
كلٍ على كيفه ، و فكره ، و جوّه
 
الوقت هذا وقت خاين و بلّاس
الناس ما عادت تحب المروّه !
 
دناءة اخلاق .. و تعرّيهم لباس
كلٍ يفاخر بإنحطاط و دنوّه !
 
ترباية مغازل و حفله و كم كاس
و اسواق فيها الدين ماشب ضوّه
 
وحقوق مرأه و ابتدايات الإنكاس
في جيل بان من الشريعه خلوّه !
 
تتهتك الاعراض في صورة احساس
تحت شعار الحب واسم الاخوّه
 
الجيل هذا جيل ضايع ومحتاس
والخبل تعرف طينته لا تفوّه !!
 
رجالهم له عند صدقانه قياس
كم بنت ضبطها و كم بنت شوّه !
 
اكبر همومه كان كشخه و لبّاس
من عند رجلينه ل حتى علوّه ،،
 
خالي من الاخلاق وضعيّف الباس
اللبس اغلا من تواجد سموّه !
 
يا وقت كافي لا تورّيني انجاس
ماعاد فيني للرذيلات قوّه !!
 
في داخلي شايب له العز نوماس
ماهو بيرضى هالزمان و نزوّه
 
ذنبه شريف وعانده كل خنّاس
ديّن و دينه ذابحٍ له .. عدوّه ،،
 
ما يتبع الحاجه ولا يحني الراس
عزيز نفس و مستغلٍ هدوّه ،،
 
لكن تعب يطرد ورا كل هوجاس
الوقت مو وقته و لا فيه خوّه !
 
محتاج اغيب و اترك الناس للناس
كلٍ على كيفه ، و فكره ، و جوّه
© 2024 - موقع الشعر