نـقـد الجنيهات

الشعر حيٍ مع حياتي ولامات
مافيه غير اللي وهبني يزيله

واللي يقول إن القصايد قديمات
نبي جديدك لو بيوتٍ قليله

بيوتٍ بلا دافع كثارٍ قليلات
وإلا الدوافع للنوادر وسيله

يازين شعرٍ مثل نقد الجنيهات
يفخر به الشاعر ليا قال قيله

فيه النواظر والمسامع بالإنصات
تقل قرينه بالقصيد يحكيله

تشوش روسٍ شايشه للجزيلات
وإلا الهزل ماجاب غير الهزيله

الشعر ماهو بس في نضم الابيات
الشاعر اللي يوفي الشعر كيله

بين القرايح ياللبيب اختلافات
واكديشها خلوه مثل الاصيله

هذا هو اللي يقطع القلب بالذات
يوم الشباري من حساب الصقيله

ماقلتها موجه سهوم اتهامات
والعلم يعرف قاصره من طويله

نظره وتبقى للرياجيل نظرات
وكلٍ على ماقيل عقله دليله