( بـيـن الاقــواس )

يالعبد لاتبدي بلاويك للناس
مايجيب دعوى المبتلى غير ربه

لو البشر تاتيك من كل الاجناس
ولو الطبيب ايجيك مافاد طبه

أرفع يدينك للسما وارفع الراس
واذكر عظيم الشان وابليس هبّه

لاتتبع الاوهام يطمعبك الياس
وتضيع في مستقبلٍ ماتحبه

والدرب لاتمشيه من غير مقياس
لازم تقيسه قبل رجلك تطبه

وليامشيته لايجي فيك وسواس
خلّك عزوم وضوّ دربك تشبه

ساير رفيق الدرب في ذهن واحساس
لاتمدحه من هرجه ولاتسبه

ارسل على قلبه ثمانين عساس
عساسة الافكار تكشف مخبه

أمّا طلع مخلوق من نوع الانجاس
والا طلع حرٍّ على اسمه تنبه

ماكل من خاواك بالدرب لاباس
كم واحدٍ رفيق دربه لعبّه

مامن رفيق المصلحه غير الاتعاس
عليك مفعول الخيانه يصبه

امن الحسد لو تنعمس زادك اعماس
يرشدك دربٍ مختفيلك مطبه

ياصفلك ويرسم كروكي بقرطاس
مع نقرةٍ مطناجها تنقلبه

حتى ليالبّسك من سود الالباس
يروغ عنك ويختفي وسط غبه

لكنّ ولع له ملايين الاكباس
يكشف قبل لامسلمٍ ينكبه

حدّ الخبيث وحاصره بين الاقواس
يالين ياصل مقلبٍ ينتصبه

دارٍ بناه يهد ساسٍ على ساس
لو محكمٍ مبناه والساس صبه

والا الرفيق اللي على العين والراس
من ثمّن الرفقه وزاد المحبه

اللي ليا حدك زمانك للافلاس
مايملكه من مال يمك يذبه

هذا رفيق العز قطّّاع الارماس
اللي خويه بالخلا مايكبه

ولو اعترضله موج للموج غطاس
يغوص غبّات البحر مانشبه

واللي يذمّه تحت الاقدام ينداس
لو انّ هبّات النمايم تهبه

الرِِّب مايلزق على غير لحّاس
ومن يلحسه يلزق على الشدق ربه

هذا كلامي واكتبه فوق كرّاس
الحق ضمنه والخطا ماانكتبه

قولٍ يصّّحي كل غافل ونعاس
واللي مايبغى الشور ماقلت لبه

والخاتمه عداد ماهب نسناس
واعداد مايبنى على السقف قبّه

واعداد ماحطوا للابواب حراس
صلّوا على المختار مرسول ربّه