ياراكب اللـي يـوم يرقـى سنـوده

هذه ثلاث قصائد لثلاثة شعراء
1- مرزوق بن غازي السلمي

2- سعود بن سعيد خميس المرزوقي
3- حمود غنام

قال مرزوق السلمي
ياسعود كيف حمود يخلف وعوده

صارت مواعيده مواعيد عرقوب
اليا بغاها منذله ما تكوده

وليا بغاها طيب فالطيب له ثوب
رجال وافي ما هفوبه جدوده

حطه على يمنالك في حزة النوب
ياسعود رحلتنا تزين بوجوده

لا ضايقٍٍ صدره ولاهرجته دوب
نبي طفيل وساحله مع نفوده

يامحلا الفنجال والنار مشبوب
والعود ريحه زين من طيب عوده

والا الخشب واجد ولاهوب محجوب
هذا الجواب ولا تحير ردوده

وانا تراني منتظر منك مكتوب
رد سعود المرزوقي

حي الجواب اللي لفت به وفوده
يامرحبا به عد براق ونصوب

وعداد من صلى وطول سجوده
يسجد لربه مؤمناً غير مغصوب

مرزوق ماكل الحبال معقوده
ولا كل رأي لكل رجال مطلوب

والمزن ما تسبق سيوله رعوده
عقب المخيله ينزل الغيث مصبوب

واللؤلؤ الصافي ثمينه عقوده
والا الخزف تلقاه في السوق مجلوب

حمود في الصعبات يثبت وجوده
يرسي لها غالب ولاهوب مغلوب

وخصلات في شخصه تجيك محموده
وغلطه وحيده ما تسبب له ذنوب

انته صديق حمود وانته عضوده
وهاذي قضية كرتها صار مسحوب

رد حمود غنام
ياراكب اللي يوم يرقى سنوده

يلف دولابه على لفت الهوب
جيب(ن) جديد ماخزنا نقوده

سقنا الثمن والمال غالي ومحبوب
شاريه ما حسبت نقصه وزوده

نبي نسج وتالي العمر مسلوب
يشبه لحر(ن) في مقادم هدوده

مدربه شيخ الصقاقير بأسلوب
شاف القطا بالجو قائم عموده

ثم فك مسباق(ن) على الرجل مصلوب
ماهو عن الحجاج موقف قعوده

نوى يفك الطير والرزق مكتوب
خائف يروح الطير من غير عوده

لأن القطا شر(ن) على الطير مندوب
وعشرين كيلو مستمر(ن) صعوده

يصارع امواج الهواء تقل عيسوب
حتى تعلا فوق شقراً تقوده

تقود جول(ن) مشتبك كنه الطوب
ابرز مخاليبه وطرف زنوده

ثم اختلط بالجول ضارب ومضروب
يشبه لباتريوت عانق سكوده

قطعان جنحان القطا كنها الروب
هاذي وصوف الفاكس سمعة وجوده

لامثله صغيرة ولامثله جيوب
ومن بعدها ياللي قوية سدوده

اسمع كلام(ن) بين صاحب ومصحوب
يامرحبا ترحيب عنبر وعوده

معتق(ن) من قمة إفرست منجوب
بأصحابي اللي كل منهم بنوده

في خطه المكتوب ماناشه عيوب
لعل ابوغازي حقير(ن) حسوده

وفي الآخرة فايز ولاعنده ذنوب
والشايب اللي خفف الوقت سوده

انا أشهد انه صار شاعر وموهوب
له قيمة(ن) بين الضلوع محسوده

الناس صوب وقيمة سعود في صوب
ياسعود لاتعط القضية بروده

هاذي قضية جالها رأس وجنوب
اللي عصى للحق لازم تقوده

واللي يبي ماجوب تعطيه ماجوب
والمدعي لابد يحضر شهوده

والا يجوز من الخصومات ويتوب