1 انا عندي نصيحة والنصيحة تنشرى بالمال
نصيحة والنصيحة تعتبر للمعتبر عبره
2 ترى بعض الكلام يقال وبعضه صعب ما ينقال
لكن احلى الكلام اللي ليا قلته على الفطره
3 وترى كل(ن) لديه افكار في رأسه عراض طوال
وترى القابض على دينه كما القابض على الجمره
4 لقيت أكثر هموم الناس كيف تجمٌع الأموال
ولو المال يأمر كل منهم يؤتمر بأمره
5 وليا قلت اشرحولي عن رجال المال والأعمال
يقلوا عبقرية والجنون وبينها شعره
6 وترانا في زمان(ن) يتعب الطيب مع البطال
وترى المكسب ورأس المال للرجال في صبره
7 وترى في حزه الشداة سهل تميز الابطال
لكن وقت الرخاء مابه وسيلة فحص معتبره
8 وترى من عاصر الدنيا يعرف ان الرجال أشكال
وترى أفضل شخص فيهم من يعيش بسيرةٍٍ عطره
9 انا اعرف لي رجالاً في الوازم للحمول جمال
يشيلون الحمول اليا توانا من قصر شبره
10 وترى ناس(ن) تزيد الكيل وناس(ن) تنقص المكيال
وناس(ن) مالها في البحر لا مده ولا جزره
11 وناس(ن) يالطيف الطف بنا يا ساتر الأحوال
ليا منه زعل يرجع لبيته ثم برد حره
12 يحسب انه ليا منه ضرب حرمة طلع رجال
وهو لو ينتخي به واحد(ن) محتاج ما سره
13 قليل العرف لو انه يبى المخراج والمدخال
ليا ضيع دروب الناس ترجع حلوته مره
14 هذاك ليا لقيته لا تجي بيته بدون جدال
انا والله ما امره لو اموت اخلاف ما امره
15 وترى من عاش بالدنيا وهو متغطرس(ن) مختال
ترى سود الليالي تجلسه في مجلس(ن) حقره
16 وترى بعض الشطارة تنقل الشاطر الى محتال
وترى من عاش بالحيله يموت ملازمه فقره
17 وترى سر السعادة والسعه في الرزق طول البال
وترى كثر الحماقه من سماة اللي قصر شبره
18 وترى التقوى هي الكنز الثمين اللي بدون اقفال
عرفها من عرفها والشقي نهايته قبره

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين