العيطمـوس اللـي تكـد الذوايـب - حمود غنام المرزوقي

العيطموس اللي تكد الذوايب
عيت تطيع من الرجال الخطاطيب

شامت عن اللي فوق عوص النجايب
كم خاطبٍ جاها على شمخ النيب

وكم واحد لاشافها عاد هايب
وكم واحد يرسل عليها المناجيب

وكم واحدٍ من دونها رد خايب
وكم واحدٍ من قو نظراتها صيب

ترجي من الله واحدٍ كان غايب
فارس احلام المملكة منقع الطيب

عبد العزيز اللي يسج الركايب
على ظهور الخيل و الفطرالشيب

الله عطاه الطيب جزل الوهايب
وهيه عشقته عشق ماشابه العيب

جاها حزينه والمراجل نهايب
سكانها يشكون سبع العذاريب

يوم ان أهلها في حروب ومصايب
جنائز(ن) يشبع بها الطير والذئب

فيها من أصناف العقايب غرايب
ويعذبون مدور الحق تعذيب

جاها وهي ترزح بظلم وعقايب
منها صغير السن يرتاع ويشيب

جاها البطل صامل بسيف العطايب
في صملته مافيه شكٍ ولا ريب

قطع طريق أهل الفتن والحرايب
وأرسل مناديبٍ تبلغ مكاتيب

وجهز لتطبيق الكتاب الكتايب
وارسل مراسيل القرى والمناديب

خلى الغنم والذيب تسرح حبايب
ورتب حياة الناس بالعدل ترتيب

يا الله عسا قبره صدوق السحايب
نوٍٍ من المنشأ مزونه مناصيب

وتعز ابو معتب عطيب الظرايب
ذرا العروبة عن سموم اللواهيب

وولي عهده غيثنا في النوايب
نبع الروى هداج صافي المشاريب

قلته وانا من عزوةٍ كل شايب
فينا يوصينا بكل المواجيب

سمو البقوم محوشين الكسايب
كسابة العليا مع الغصب والطيب

للطيب طيب وللتحدي غصايب
مثل الحرار اللي برؤس المراقيب

الطيب يزرع والمراجل وهايب
ستر الضعاين والبني الرعابيب

نارد حياض الموت ولنا الغلايب
دون النخيل ودون حرش العراقيب

ولا ننفرد بالطيب والحق صايب
كل القبائل طيبهم له تجاريب

كل القبائل ما عليها معايب
للحرب نار وللضيافة معازيب

كم شيخ قومٍ يرتكي للنشايب
ويضرب على الكايد ولو انه صعيب

© 2024 - موقع الشعر