اللـي يصرفنـي لاقلـت باجـيـك - مطلق ناصر ال طايع الهاجري

اللي يصرفني لاقلت باجيك
حلفت لو ماالقى معازيب ماجيه

ياشيخ انا غني واقول الله يغنيك
اللي عطاه الله القناعه بتغنيه

مطامعي متعديات مخابيك
اطمع مزايا الرجل مطمع مخابيه

لاجيتك اشحذ قول مانيب معطيك
اجيك ضيف واجب الضيف يبغيه

هلا وسهلا وارحب الله يحييك
كرامة الضيف يبيها وتقريه

ماقول فيك قصور صيتك يكفيك
خايف على حظي ولا نيب مهفيه

وشيخ ولد شيخ ولا فيك تشكيك
لاشك شيخا لايبيني ولابيه

لاهوب كرها لك ولادقة فيك
طبعك يخرب طيبك اللي تسويه

منته ببوي اقول عونك ولبيك
سمّ ونعم وافرح ولاهوب لبيه

لبيه لو تكتب ثمنها على شيك
حبة خشم جاااااااااالس ولبيه مافيه

اعلم وادر مافي الهواجر صعاليك
شئ ينزل روسنا ماندانيه

ماحنب للخرده عبيد مماليك
لو تملك الخرده من الهيه للهيه

نذر ويمين اثنين والثالثه ذيك
مااخضع براسي للمصالح ووطيه

نفسي عزيزه فوق سحب السما تيك
اهين نفسي ليه واذ لها ليه

الكنز عز النفس للاعلى يعليك
من عز نفسه للعوالي تعليه

بصيحلك يا اللي صياحي بيصحيك
اللي بيصغي للنصيحه بتصحيه

لامنك خليت المعزه تخليك
مهيب دكان تبيعه وتشريه

ماشي تمشيها وهي ماتمشيك
ما يمشي اللي يبي ماشي تمشيه

يااللي لك اذن تسمع اللي يوصيك
وصّاك مطلق وابومطلق موصيه

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • التعليقات المنشورة غير متابعة من قبل الإدارة. للتواصل معنا اضغط هنا.
© 2021 - موقع الشعر