دار الزمـــــــان

دار الزمان وقمت اهذري بلا اسباب
واقول قول(ن) ما نتوارى بردّه

بيّن عليّه بين الاصحاب واقراب
ومن شافني قرّر علي المكدّه

وسط الضماير لاهب(ن) يلهب الهاب
وشي يخج قلبي بسهم يحدّه

وبالصدر تكّاك(ن) ومخلب وعشّاب
وقابض وخافض والنفس فيه شدّه

وعند الكلام لغيرها يظهر انشاب
وبالراس صا دوع وفاس محدّه

وروايح الدنيا بخشمي لها اغراب
ومناظري للكون بعين(ن) مصدّه

وبالبطن لاوي والمشارب بالاغصاب
وتقاربت خطاي من عقب مدّه

والنوم وان قلت آه ماهوب ينجاب
والنفس يانفسي غثاها المودّه

ان كان قامو قمت ما دري بما صاب
وكاني قعدت فقعدتي مستهدّه

كله سبايب من نوى لي با لانشاب
جعله مهف مقيط ماله مردّه

عساه مثلي يسهر الليل بانحاب
يبي حبيبه والحبايب تصدّه

وهذي سوايا الحب ولا به اطباب
ياللي جهلت بقاصي الحب مدّه

وذي سبة اللي معرفتها لي اكراب
النار بفراقه علي مستجدّه

من قبل شوفه سالي(ن) مابي اتعاب
ومن شفتها والنفس يمّه ملدّه

من قبلها كل الخلايق لي احباب
ومن عقبها مالي على الناس ردّه

ان قابلت صارت ثساهيل والعاب
وانسى لو ان الناس يمّي مودّه

ماغير انا واياه وقلوبنا احباب
ماحد(ن) حداي ولاحد(ن) يم حدّه

لو شافها مصلي يصلي بمحراب
قطع صلاته وافترك يم خدّه

ولو اخطمت قدام مأذّن بميزاب
خّلا اذانه واطلق الصوت حدّه

ولو القاضي شافها عقب ما شاب
قلب قضايا الخلق كلّه مودّه

ولو مرت الحاكم وهي تلبس الكاب
قال اسمعوا ياناس لاحد(ن) يردّه

فيها المزايا كلها ما لها احساب
ولاجمال الحور يلدي للدّه

لو كان ليّه بالتسابيب مقضاب
لحط ملك الارض كلّه بيدّه