ودك ان كـل مـن سـوى قصيـده حكرهـا

كل ما جيت بكتب فكرتي واختصرها
غبت في حاجتي وانبه بطول الكتابه

وكل فكره تجي في البال والا افتكرها
بلت الفكر ما بل اليباس السحابه

المعاني بفكري يوم احمض صورها
مثل عبدا دعا الله ساعة مستجابه

يجبر الله بخاطر من بيوته جبرها
ومن ثعاها بشرهه ينتف الله شبابه

ويا عسى من تراكى لحملة ما قدرها
تطرحه في خلا(ن) يجمع عليه الذيابه

لين غيره يشوف الموعضه واعتبرها
ولا يسوق القدم قدام يحسب حسابه

كل شجره ونعرف بذرها من ثمرها
ووش حصيل الغناوي من حصيل الغلابه

رثعة الشخص باقدامه تجي ونعذرها
مير رثعة لسانه عيبها تنحكابه

الاوادم تلبس ثوبها اللي سترها
ومن عيوبه كلامه ما استرنه ثيابه

بعض الاجواد يوم الله تعالى عثرها
ان لقى خير رده وان لقى شر جابه

ودك ان كل من سوى قصيده حكرها
مير ما كل لحن لعود جره ربابه