مرحبا ثم مرحبا بإللي لفى من كل ديرة
عد همال المزون وعد نسناس الهبايب
قاله اللي ينطق لسانه بما يخفي ضميرة
والمعرفة والكلام الزين من ربي وهايب
ياهل الطالات جيتكم لنا عز وكبيرة
ثالث الاعياد شوفتنا لكم والحظ طايب
ليلٍ مبارك عسى ربي يهنينا بخيرة
ويرحم إللي فوقهم حطت طواليب ونصايب
يذكر الإنسان لا منة غفل وش هو مصيرة
حفرةٍ لا ضبت ضلوعة تخليها حطايب
روضةٍ في جنته وإلايصالى في سعيرة
والحظيظ إللي يلاقي ربه من الذنب تايب
واحدٍ فردٍ صمد يعلم بما تخفي السريرة
وكون الإنسان من مضغة من الصلب وترايب
قَطعة الأرحام للمسلم ترى ذنب وخطيرة
والكوارث تنتشر ونقول وش جاب المصايب
وبعدها يوم العذاب إللي عبوس قمطريره
تشخص الأبصار ويخلي رضيع الديد شايب
في رجاء اللي محصين كل الصغيرة والكبيرة
يعلم إللي فات وإللي باقيٍ في الكون غايب
دام عزك ياوطنا في ذرى قايد مسيرة
ابو متعب خادم البيتين فكاك النشايب
في ذراك الشعب يامن ياولد صقر الجزيرة
ياهل الطاله هل العوجاء عطيبين الضرايب
وأنت أبوك موحد الإسلام باليمنى الشطيرة
والسلاح السيف والبندق على خيل وركايب
وأضحكت له بالحجاج ولاتبي رجال غيرة
وأشرقت شمس الضحى فيها وأمشطة الذوايب
ياعسى في جنة الفردوس مأواه ومصيره
تحت رحمة واحدٍ من يشحذه ماهو بخايب
من شمال المملكة مارد سيفه في جفيره
لين حررها وصارت وامنه عقب الحرايب
والختام أقول جعل الله يمسيكم بخيرة
عد همال المزون وعد نسناس الهبايب

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلى نادراً.
  • لتواصل مع ادارة موقع الشعر إضغط هنا.
© 2019 - موقع الشعر - بواسطة شركة المبرمجين