جـــيـت يـا صـرف الـزمـــان

جيت ياصرف الزمان معوّد الناس العناد
جيت ماتترك وليف (ن) مع وليف (ن) به يروق

جيت ماترحم مشاعر راعي الرأي السداد
جيت واقف فوق راسه عن حبيبه له تعوق

جيت ماترضى التوافق جيت وجهك به سواد
جيت تسحق كل عشق (ن)جيت ماتبي الشروق

جيت تبي الكون ظلما ما بهالدنيا وداد
جيت تجرح قلب عاشق تبْعد الخل الشفوق

جيت ما تبي التفاهم ذا بواد وذا بواد
جيت ماتمسح دموع (ن) بالمحاجر له بروق

جيت ما عندك مروفه والقسا كلّك وكاد
جيت ياصرف الزمان ونيّّتك خسّه وبوق

جيت لا حيّا مجيّك ما تبى الوضع الركاد
جيت بالفرقا تجرّه تجْعله وسط الخفوق

جيت تطرد كل حلم (ن) ينتعش فيه الفؤاد
جيت تلعن سلسفيل النبض في وسط العروق

جيت تسرق كل فرحه تملأ الجوف بْنكاد
جيت تشعل نار قسوه من فعايلها حروق

جيت تمسح كل بسمه تكثح بْوجهه رماد
جيت تمرض كل صاحي تلوي ذراع الحقوق

جيت تشطب كل حرف (ن) ينكتب عند السهاد
جيت تبعد كل ذكرى فيها للخاطر عبوق

جيت تكره نسمة (ن) بالصبح مردوده زباد
جيت تقلع وردة (ن) للحب حمرا من عروق

جيت تقطع كل وصال (ن) يسرّه رب العباد
والدليل اللّي عملته وعلّمتنا فيه شوق