الصحبة اللي غرّت القلب

ما فات مات وكل ما هو لنا آت
يوم البشر بافعالهم يفرقوني

الناس ما بين الحساني وسيات
زادت هممهم فيه مايشبعوني

كلٍ على فعله يزيد السجلات
واللي على فعل الخطا يندموني

لو جرّ منه القلب في العمر ونات
ما عاد ينفع ليت والا ارْحموني

الحي فعله حي يبقى ولو مات
ذكره ينومس كل جيلٍ يجوني

مير البلا لآ صار في العمر سجّات
لو الذكا دسّ الغبا في جفوني

الصحبة اللي غرّت القلب لحظات
واعمت عيوني واستمرت تموني

ليت الزمن يرجع واعيد الحسابات
يوم انكشف حيد الغطا عن عيوني

واشطب على بعض البشر في الملفات
بانت حقايقهم وخابت ظنوني

ما دام مات بعمرنا كل ما فات
يالله عفوك قبل ريب المنوني