الحرّ يبغى له كفالة من فريخ

يا ونتي ما ونها غير قمري
قبل الشعاع وقبل ما أذن الشيخ

من هم دهر ٍ قد تعوّذ بشرّي
نوّخ به الشامخ وعلّت منافيخ

والله لو انه رجل كان يسري
عليه من يدّي طقوق ٍ وتوبيخ

يجري على العقّال ما كان يجري
في مجلسن ضاق بحرارن شواميخ

اللي حلب ديك وحمامة وكدري
تطير من هرجه جناح الصواريخ

غنّت له الدنيا وهو كان فقري
وفرّع لها راسه تقل راس بطيخ

إن قلت: قمنا قال: يا رجل بدري
_بدري من اعمار الرخوم المداليخ_

عز الله انه طيحة شريم تغري
والحر يبغى له كفالة من فريخ

شبّت لكم نارن ونا نام جمري
تحت الرماد وانبش بعاكف السيخ

أكوي به جروحن مع الوقت تزري
أوّاه من جرحن سببه الفواسيخ

كم واحدن حظّه مع الناس حدري
وهروس بيته من جلود المصاليخ

دهرن على روس النجاجيب يظري
لى جنحها يرسي عل ظهر مرّيخ

فرايدن من تجربة قهر دهري
كتبتها قاف ٍ وسجّل يا تاريخ