الدرب الطويل - عامر الأشجعي

على الدرب الطويل اللي تلاقت به طيوف احباب
تثاقلت الخطا والريح تسأل ليه وحداني

تهب وتعصف بصدرٍ به احزاني تحط ركاب
تسامرني واسامرها على قيثارة احزاني

وانادي في مهب الريح لاترحل بدون اسباب
وقبل ترحل خذ عيوني معك يالقاصي الداني

عساها تشفع لقلبٍ ورى اسوار الحنايا ذاب
تبرى مني بحبك ومدري وين وداني

خذيت اللي تبي مني وانا اعطي لك بدون حساب
ولو عندي عمر ثاني : عطيتك : عمري الثاني

ولكن يابعد روح القصيد وسحره الخلاب
على شاني تذكرني : اذا فيها على شاني

انا مدري وش المضمون عندك والعيون كتاب
مدامك في نظر عيني قواميسي وعنواني

حبيبي شف تقاسيم الوجيه اللي رجاها خاب
ابي لو مره عيونك تحللني وتقراني

حبيبي حطني مره بقلبك في محل اعراب
كفايه كفتك مالت ولازالت بميزاني

حبيبي شف ظلام الليل من خلف المباني شاب
بعد عزو الصباح اللي سرق من نورك الساني

انا مثل الضيا بقربك ولكن : لو نويت غياب
انا ليلٍ تلاعب به رياح الحزن باغصاني

حبيبي : لاتبرر لي تقول : ان الطيور اسراب
لك الله : من عرفت امشي : مشيت الدرب وحداني

بعد ماكانت بحور القصايد : ترتويك اعجاب
ضميتك شاعر : وخلك مع الأيام تضماني

تعليقات الزوار

  • كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
  • بعض صور الشعراء و الشاعرات غير صحيحة، نرجو تبليغنا إن واجهت هذى المشكلة
  • إدارة موقع الشعر لا تتابع التعليقات المنشورة او تقوم بالرد عليها إلاّ نادراً.
  • للتواصل مع ادارة موقع الشعر إضغط هنا.
© 2021 - موقع الشعر