زيد المليحي - محمد بن فرزان

يا مرحبا ترحيبةٍ شانها شان
بروس ( قحطان ) اللي لفونا مسايير

ترحيبةٍ ينطق بها قلب ولسان
الذ واحلى من حليب المصاغير

وارق وانعم من ورودٍ ببستان
وآحد واقسى من السيوف البواتير

في مجلسٍ ما شابهه كل ديوان
مفتوح بابه دايمٍ للمناعير

بانيه منهو ما يحسّب للاثمان
نادر حرارٍ ما يحسب المخاسير

طير السعد طير الهدد طير حوران
عوق الطيار وعوق ربدٍ مخامير

ساسه كرم والطيب والمجد عنوان
ذراه يذري عن هبوب المعاصير

سمعته شاشت من ورى مصر وعمان
مزبان منهو لوّعته المقادير

( زيد المليحي ) ريف من كان عطشان
ماهو من اللي يقدمون المعاذير

والمدح ما يستاهله اي انسان
يا كود منهو مزبنٍ للمقاصير

تركز له البيضاء على راس ما بان
يطرخ علمها فوق روس الشناظير

من لابةٍ بالضيق تروي شبا الزان
لاجاء نهارٍ فيه شرٍ بلا خير

لا صاح صيّاح الضحى قيل ( سبعان )
تفرح بهم شقح البكار المغاتير

وباق القبايل حقهم دون نقصان
كامل ولا بفعولهم اي تقصير

في ما مضى واليوم في أمن وآمان
بظل الملوك مطوعين الطوابير

وارجع واقول اهلا وسهلا بقحطان
لنا الشرف في شوفكم يامناعير

© 2024 - موقع الشعر