طيبه يزود ولا بعد لحق حدّه

اعوام اخطط للزيارة على شان
شوف وسلام وحبةٍ فوق يدّه

( عبدالعزيز ) كتاب والطيب عنوان
حرٍ تعلّى في مقام .. الاشدّه

حرٍ تسلسل من مواكير شجعان
ميقافهم بين المواقف تعدّه

مركاضهم يشبع به الذيب سرحان
لا قيل ياهل الخيل روحه وردّه

يوم السنين الماضية يوم الاكوان
يردون حوض الموت ما قيل صدّه

عن سلمهم ما حاد عنّه ولا هان
نادر حرارٍ لك يبين ابمهدّه

حرٍ تعلّى في حجا راس ما بان
بيمناه لا ما اكفاه بالفعل جدّه

يا عنك وجهه ما تغيّر ولا شان
لا جاه منهو بيّح الوقت سدّه

منهو نصاه يشوف قدمه بليهان
في مجلسٍ له ينطحك ريح ندّه

هداج تيماء ريف من كان عطشان
في لاهبٍ بالقيض في مجرهدّه

بيته لمن هو حدّه الوقت مزبان
اللي زمانه شد جيبه وقدّه

يمناه ياما كفكفت دمع يتمان
وكم ضامياً روّى بعد ورد عدّه

بالطيب متقلد له عنان وسنان
رام المراجل لين صارت تودّه

حتى غدى للطيب ملجا وميدان
ويضد منهو بالزمن صار ضدّه

طيبه كما برقٍ وسط غر الامزان
خطه عريض من الخبر لين جده

اطرق خطل متسرحٍ كنّه حصان
طيبه يزود ولا بعد لحق حدّه

كل الخصايل وهبةٍ في كحيلان
مثل البحر يغني عن الجزر مدّه

بعز الشدايد ما تراخى ولا .. لان
يزيد مع شدّات الايام شدّه

من جاه شاف اللي يذكّر بالاعيان
طلقٍ حجاجه مايخجّل مردّه

للمجد عين وصار له عين ولسان
له سيرةٍ من ( الفهد ) مستمدّه

واليوم شعري يفتخر قاف واوزان
دامه يزيده مجد لا مايهدّه