لعيون خلّي - حسين خميس آل علي

لعيون خلّي كل شي يهون
حتى العمر والروح بعطيه

لأنّي بحبه صرت مفتون
شاقتني أوصافه ومعانيه

خلّي يساوي نور لعيون
وأكثر بعد أكثر أغلّيه

أهواه وآحبّه المضنون
سيدي ولا حدٍ يساويه

كلما زقرته قال لي عون
ما ردّني في اللّي أنا أبغيه

ممنون أنا له دوم ممنون
له كل عمري وما بقى فيه

بيني وبينه ود مخزون
ما شاع عند الناس طاريه

حلفت أنا والله ما أخون
عهده ولا أقدر أجافيه

© 2024 - موقع الشعر