راعي الوجهين

لـ خالد المخيدش، ، في غير مُحدد، آخر تحديث

راعي الوجهين - خالد المخيدش

الصحيح يعوّدك ترك المغمّه
والوقوف يعلّمك قسوة مطيحك

لاتقول أنك خلّي من المذمّه
كل علمٍ ينبش الشك بصحيحك

ليه مستعجل على رد المهمّه؟
البحر يعطي ولا ينطر شحيحك

لو تحريت البسيطه والملمّه !؟
ماندى كفي وأنا نطّاح ريحك

كنت أبيحك لو تسوي بي مطمّه
بس عقب البارحه ماني مبيحك

راعي الوجهين مثلك بار دمّه
زيد ويحك من سوادك زيد ويحك

ماتعوّدت ألتفت لأهل المذمّه
ومايهمن لو كثر يمي نبيحك

ماخشيت من الرماح ألا المسمّه
وماكسرت من الرماح ألا نطيحك

وماشريت من الرجال ألا المتمّه
وماحقرت من الرجال ألا طريحك

دامني من روس شمر زدت همّه
الرجال اللي مواطيها تزيحك

نجمنا في حروة الجوزاء مزمّه
ومن تواضع هيبتي..شفني نصيحك

مشربي من بير ماتأصل مجمّه
تقصر ركابك ولو طوّل فحيحك

© 2023 - موقع الشعر